講起批評，不得不提一個鍾意影相嘅中學同學。
讀書嗰陣佢成日都會拎自己部相機返學校左影右影。開始只係純粹興趣，無諗乜嘢技術。當時機又唔勁，又無 photoshop 呢類執圖軟件輔助。所以老實講，出嚟嘅效果真係好麻麻。
記得曾經有同學睇完佢嘅相之後話好難睇（咁真性情真係難影得好嘅），叫佢以後唔好再影。又有人趁佢影相嗰陣一手搶走佢部機，話自己肯定影得俾佢好。我諗，當時佢心入面肯定唔好受，但每當遇到呢種事，佢都係一臉大方咁笑一笑。然後，諗辦法提升技術。
有次佢俾訓導沒收咗部相機，班主任代佢求情，幫佢拎返之後同佢講：「我知你好似想以攝影為將來職業，但你都應該清楚香港做呢份真係無乜前途，作為興趣減壓就唔同…」記得佢聽完，堅定咁回答：「我明，但我都係想試下。」老師無奈，然後用佢嘅主觀角度不慍不火咁講：「俾你影得好嘅大有人在，你自問自己真係上到台面？」
台面…若干年後嘅今日，呢位同學已經有自己嘅一間攝影公司、幾個攝影獎、仲經常幫新款相機做試拍，影雜誌嘅宣傳圖。
批評，不論你係追夢定係走一段正常路，都總係會遇上。善意嘅，咪化作前進嘅原動力；惡意而又零成本嘅，笑一笑。笑完之後，你會發現根本唔算係乜嘢。
-----------------------------------------------------------------------------------
FB: 有心 無默
IG: https://instagram.com/echoofheart/
Search